Tap Orkuveitu Reykjavíkur nam 6.180 milljónum króna á fyrstu sex mánuðum 2006, samanborið við 1.474 milljóna króna hagnað á sama tímabili árið áður, segir í tilkynningu til Kauphallarinnar.
Rekstrartekjur fyrstu 6 mánuði ársins námu um 8.524 milljónum króna en voru um 7.181 milljón fyrri hluta árs 2005.
Hagnaður fyrirtækisins fyrir afskriftir, fjármagnsliði og skatta, EBITDA, var 3.841 milljón króna samanborið við 2.879 milljónir króna á sama tímabili 2005.
Með nýjum lögum nr. 50/2005 um skattskyldu orkufyrirtækja verður fyrirtækið skattskylt í samræmi við 2. gr. Laga nr. 90/2003 um tekjuskatt. Lögin koma til framkvæmda við álagningu tekjuskatts á árinu 2007 vegna tekna á árinu 2006. Sá hluti starfsemi OR er lýtur að rekstri vatnsveitu og fráveitu verður þó áfram undanskilinn tekjuskatti. Reiknuð tekjuskattsinneign fyrstu 6 mánuði ársins nam 3.668 milljónum króna.
Langtímaskuldir OR eru að stærstum hluta í erlendri mynt. Gengistap Orkuveitu Reykjavikur af langtímaskuldum nam 10.865 milljónum króna fyrstu 6 mánuði ársins, segir í tilkynningunni.
Í tilkynningunni segir að horfur séu góðar um rekstur Orkuveitu Reykjavíkur á árinu 2006, umsvif fari verulega vaxandi og fjárfestingar séu mjög miklar.
Stærsta einstaka verkefnið er bygging nýrrar virkjunar á Hellisheiði sem mun stórauka eigin orkuvinnslugetu fyrirtækisins.
