Viðskiptablaðið greindi frá því í gær að Orkuveita Reykjavíkur hafi tapað 2,6 milljörðum króna á fyrsta ársfjórðungi þessa árs. Bjarni Bjarnason, forstjóri OR segir í samtali við ViðskiptaMoggann að tapið sé tilkomið vegna gangvirðisbreytinga sem stjórnist af samningum um raforkuverð til Norðuráls.
Hann segir jafnframt að það valdi sífelldum ruglingi varðandi uppgjör félagsins sé færsla í reikningnum sem kallist „gangvirðisbreytingar innbyggðra afleiða í raforkusölusamningum." Þar sé um að ræða 7,8 milljarða kostnað á fjórðungnum en í ársreikningi Orkuveitunnar kemur fram í skýringu sex að á sama tíma í fyrra hafi færslan verið jákvæð um 1,5 milljarða.
Þá bendir hann á að ef álverð er hátt þá geti afkoma fyrirtækisins að sama skapi orðið jákvæð.
