Greiðsluuppgjör ríkissjóðs fyrir janúar til september liggur nú fyrir og gefur upplýsingar um afkomu ríkissjóðs á grundvelli innheimtra tekna og greiddra gjalda. Tekjujöfnuður var jákvæður um tæpa 76 milljarða — samanborið við það að hann var neikvæður um tæpa 3 milljarða á sama tímabili í fyrra.
Afborganir lána á tímabilinu námu 126,8 milljörðum króna. Alls tók ríkið lán að fjárhæð ríflega 31 milljarða króna samanborið við lán upp á 48 milljarða á sama tímabili í fyrra og 166,9 milljarða á sama tíma árið 2014.
Tekjuskattur
Tekjuskattur einstaklinga jókst um 21,4% milli ára á tímabilinu og var 108,7 milljarðar frá janúar til september.
„Aukningin milli ára endurspeglar miklar almennar launahækkanir og hátt atvinnustig sem jafnframt skýrir jákvætt 10,1% frávik frá fjárlagaáætlun. Fyrir vikið eykst innheimta tekjuskatts verulega milli ára þrátt fyrir lækkun á skatthlutfalli í 1. og 2. þrepi í ársbyrjun,“ segir í greiðsluafkomunni.
Tekjuskattur á lögaðila lækkaði hins vegar um 17,2% milli ára á tímabilinu en hann nam 38,2 milljörðum milli janúar og september 2016 miðað við 42,4 milljarða árið áður.
Tekjur ríkikssjóðs af vörugjöld á ökutækjum aukast um 29% á tímabilinu úr 5,2 milljörðum og upp í 6,7 milljarða það sem af er árinu 2016. Alls jókst skattinheimta á vörur og þjónustu um 12% frá fyrra ári, en á fyrstu 9 mánuðum ársins 2015 voru tekjurnar 170,8 milljarðar en árið 2016 191,3 milljarða. „ Aukningin milli ára endurspeglar aukinn kaupmátt heimilanna og uppgang á mörgum sviðum atvinnulífsins,“ að mati Fjármálaráðuneytisins.
Gjöld
Greidd gjöld námu 506,3 milljörðum kr og jukust um 33,9 milljarða króna frá fyrra ári, eða um 7,2% sem er minna en gert hafði verið ráð fyrir.
Stöðugleikaframlög
„Stöðugleikaframlög frá slitabúum hafa runnið til ríkissjóðs í formi ýmissa eigna á árinu. Bókfærð innheimta vegna þeirra á tímabilinu janúar til september nam alls 68 ma.kr. Þar af komu 17 ma.kr. til ráðstöfunar hjá ríkissjóði í stað þess bankaskatts sem áður var áætlað að lagður yrði á slitabúin en 51 ma.kr. var í mars og júní notaður til að greiða niður lán frá Seðlabanka Íslands. Hafa ber í huga að hér kemur aðeins fram sá hluti stöðugleikaframlagsins sem hefur verið ráðstafað með framangreindum hætti, en stærstur hluti þess auk hliðaráhrifa á aðrar tekjur, er aðgreindur frá hefðbundnu tekjuuppgjöri ríkissjóðs,“ er einnig tekið fram í samantekt Fjármálaráðuneytisins.