Tekjur Norðurál Grundartanga ehf. jukust milli ára, en þær námu ríflega 71 milljarði króna árið 2015 samanborið við rúmlega 69 milljarða ári áður, á gengi dagsins í dag. Þrátt fyrir að tekjur félagsins hafi aukist milli ára þá dróst hagnaður félagsins verulega saman milli ára.
Hagnaður félagsins nam 5,6 milljörðum árið 2015 samanborið við 10,2 milljarða króna. Mestu munar um að framleiðslukostnaður jókst um 5,6 milljarða milli ára.
Fram kemur í ársreikningnum að afkoma félagsins sé mjög háð álverði auk aðgangs að raforku og starfsfólki. Eigið fé félagsins í árslok nam 48,7 milljörðum króna og eiginfjárhlutfall var 58,1%. Félagið áætlar að greiða arð til eigenda sem nemur ríflega 4,9 milljörðum króna. Norðurál ehf. á 100% í Norðurál Grundartanga ehf. en Norðurál ehf. er í eigu Century Aluminum.