Tekjur ríkissjóðs hafa aukist um 16 milljarða og skattstofnar hafa tekið við sér umfram væntingar. Þetta kemur fram í samtali mbl.is við Bjarna Benediktsson fjármálaráðherra en hann kom á fund fjárlaganefndar í dag til að kynna uppfærða tekjuáætlun.
„Það sem við sjáum að gerist hjá okkur er tekjunar eru að aukast um rúmlega 16 milljarða og þannig skapast enn frekar svigrúm fyrir skuldaaðgerðirnar og niðurstaðan er þá sú að þrátt fyrir að skuldaaðgerðir verði teknar inn í fjáraukafrumvarpið fyrir 2014, þá mun afkoman samt sem áður batna ,“ segir Bjarni í samtali við mbl.is.
Hann bætti því við að meginskilaboðin séu þau að skatttekjur og tryggingagjöld eru að hækka enn frekar en gert var ráð fyrir. Án skuldaaðgerðanna hefði stefnt í afgang á fjárlögum upp á 60 milljarða en fjárlög gerðu ráð fyrir eins milljarða afgangi.