Tekjur Skakkaturns ehf., umboðsaðila Apple á Íslandi, námu 7,8 milljörðum króna árið 2021, sem er um 30,8% aukning frá fyrra ári. „Söluaukningin náði til allra vöruflokka og jafnt í heildsölu, fyrirtækjasölu og smásölu í verslunum,“ segir í nýbirtum ársreikningi félagsins. Velta Skakkaturns, sem rekur verslanir Eplis, hefur þrefaldast frá árinu 2016.

Skakkiturn hagnaðist um 609 milljónir króna eftir skatta á síðasta ári sem er 242 milljóna aukning frá árinu 2020. Rekstrarhagnaður fyrir afskriftir (EBITDA) hækkaði úr 479 milljónum króna í 797 milljónir króna á milli ára.

Vörunotkun vó 94% af ríflega 7 milljarða króna rekstrargjöldum Skakkaturns. Nær öll innkaup félagsins eru í Bandaríkjadollar. Ársverk voru 27,6 og laun og launatengd gjöld námu 283,4 milljónum.