Samkvæmt skattframtölum landsmanna fyrir árið 2007 námu tekjur einstaklinga 992 milljörðum króna. Þessum tekjum er skipt í tvo flokka með tilliti til skattlagningar, þ.e. launatekjur og fjármagnstekjur.
Þetta kemur fram í vefriti fjármálaráðuneytisins.
Þar segir að árið 2007 námu launatekjur landsmanna 610 milljörðum króna og höfðu aukist um 13,8% frá fyrra ári. Það ár námu fjármagnstekjur einstaklinga samtals 244 milljörðum króna.
„Á undanförnum árum hefur hlutur fjármagnstekna farið vaxandi í heildartekjum einstaklinga,“ segir í vefritinu.
„Skattlagning fjármagnstekna var einfölduð árið 1997 þegar fallið var frá skattlagningu þeirra eins og um launaðar tekjur væri að ræða.“
Þá er fullyrt að öran vöxt fjármagnstekna undanfarin ár megi rekja til þess m.a. að möguleikar einstaklinga til að ávaxta fé sitt hafa farið mjög vaxandi. Skattstofn fjármagnstekna telur bæði vaxtatekjur, arð og leigutekjur en einnig arð af sölu hlutabréfa og það er síðasttaldi flokkurinn sem hefur vaxið langmest á undanförnum árum, samkvæmt vefriti ráðuneytisins.
Þar af voru 151 milljarðar króna vegna söluhagnaðar en 94 milljarðar vaxta-, arð og leigutekjur.
