Tekjur samfélagsmiðilsins Twitter náðu sögulegu hámarki á fjórða ársfjórðungi síðasta árs. Alls námu tekjurnar á tímabilinu 1,29 milljörðum dala og jukust um 28% í samanburði við sama tímabil árið áður. Þetta kemur fram í frétt BBC .

Var þessi tekjuaukning framar spám greinenda en vöxtur nýrra notenda var þó minni á tímabilinu en greinendur höfðu gert ráð fyrir.

Snemma á þessu ári lokaði Twitter reikningi þáverandi Bandaríkjaforseta, Donald Trump, og telja greinendur að það gæti haft áhrif á afkomu félagsins á yfirstandandi ársfjórðungi.

Jack Dorsey, forstjóri Twitter, hefur þó litlar áhyggjur af því. „Við erum vettvangur sem er augljóslega mun stærri en eitthvað eitt málefni eða einn reikningur.“