Stjórnendur Íslandsbanka telja upplýsingar um heildareftirspurn í hlutafjárútboði N1 ekki vera verðmótandi upplýsingar. Þetta má ráða af svari þeirra við fyrirspurn Viðskiptablaðsins um málið.

Þegar tilkynnt var um niðurstöður hlutafjárútboðs N1 á miðvikudag vakti athygli að þar var ekki að finna upplýsingar um heildareftirspurn bréfanna líkt og gert hefur verið í fyrri útboðum, eins og í tilfelli TM og VÍS. Þegar eftir því var leitað fengust þau svör hjá bankanum að upplýsingarnar yrðu ekki birtar. Einungis voru birtar upplýsingar um fjölda þeirra sem skráðu sig fyrir hlut í útboðinu en ekki heildarupphæð tilboða.

Þess má geta að sú gríðarlega umframeftirspurn sem var til að mynda í útboði TM og VÍS leiddi til þess að Fjármálaeftirlitið hóf rannsókn á málinu og óskaði meðal annars eftir svörum frá fjárfestum um bolmagn þeirra til að gera þau tilboð sem þeir settu fram. Í tilfelli hlutafjárútboðs N1 kom fram í tilkynningu að mikil umframeftirspurn hafi verið eftir bréfunum, en eins og áður hefur komið fram þá hefur Íslandsbanki, umsjónaraðili útboðsins, ekki viljað gefa nánari upplýsingar um umframeftirspurnina.

Viðskiptablaðið sendi eftirfarandi spurningar á Íslandsbanka í morgun:

  • Hversu margir aðilar hafa aðgang að upplýsingum um heildareftirspurn í útboðinu?
  • Telja stjórnendur Íslandsbanka (umsjónarmenn útboðsins) að þessar upplýsingar séu verðmótandi?
  • Ef þær eru verðmótandi, þarf þá ekki að birta þær?
  • Ef bankinn telur þær ekki verðmótandi, hver er rökstuðningurinn fyrir því?

„Send hefur verið út tilkynning um niðurstöður útboðs með þeim upplýsingum sem skipta máli og geta talist verðmótandi," segir í svari Íslandsbanka við fyrirspurn Viðskiptablaðsins.

Þess má geta að skráðum fyrirtækjum í kauphöll er skylt að birta verðmótandi upplýsingar. Upplýsingaskyldan tekur gildi frá birtingu lýsingar sem þegar hefur verið birt í tilviki N1. Viðskipti með bréf N1 hefjast í næstu viku.

Hér má sjá tilkynninguna um niðurstöður útboðsins sem birt var á miðvikudag:

Niðurstöður útboðs á hlutabréfum í N1

Mikil umframeftirspurn var eftir hlutabréfum N1 hf. í almennu útboði sem lauk 9. desember síðastliðinn og bárust alls um 7.700 áskriftir. Útboðið var tvískipt og verða 18% hluta í félaginu seld á 18,01 krónu á hlut í tilboðsbók B en 10% seld á 15,3 krónur á hlut í tilboðsbók A. Heildarstærð útboðsins nemur 280 milljónum hluta og er heildarsöluandvirði þeirra 4.770 milljónir króna.

Þátttakendur í tilboðsbók A skiluðu um 7.200 áskriftum og í ljósi mikillar þátttöku er hámarksúthlutun um 183.000 krónur að kaupverði á hverja áskrift. Áskriftir að lægri fjárhæðum ásamt áskriftum viðskiptavaka og fastráðinna starfsmanna N1 eru ekki skertar.

Áskriftir í tilboðsbók B voru metnar á grundvelli verðs og verða hlutir seldir til þeirra aðila sem buðu hæst. Alls var 31 áskrift samþykkt. Áskriftir sem bárust á verði yfir útboðsgengi í tilboðsbók B eru ekki skertar en áskriftir sem bárust á því gengi eru skertar hlutfallslega.

Seljendur í útboðinu eru FSÍ (Framtakssjóður Íslands) slhf. og Íslandsbanki hf., sem hefur ákveðið að nýta heimild sína til að stækka útboðið úr 25% hluta í N1 upp í 28% en aukningunni er ráðstafað í tilboðsbók B. Í október síðastliðnum nýtti hópur fjárfesta rétt sinn á að kaupa 18% hlut í félaginu af FSÍ og Íslandsbanka. Þessir tveir aðilar hafa því að útboðinu loknu selt samtals 46% hlutafjár í N1 á fjórða ársfjórðungi 2013.

Íslandsbanki annast framkvæmd útboðsins og mun senda fjárfestum tilkynningu um úthlutun í útboðinu og greiðslufyrirmæli þegar NASDAQ OMX Iceland hf. hefur staðfest að hlutabréf N1 verði tekin til viðskipta á Aðalmarkaði Kauphallarinnar.

Gert er ráð fyrir að gjalddagi og eindagi greiðsluseðla vegna útboðsins verði 17. desember næstkomandi og greidd hlutabréf verði afhent 18. desember. Gert er ráð fyrir að 19. desember geti viðskipti hafist með hlutabréf N1 á Aðalmarkaði, en Kauphöllin mun tilkynna um fyrsta viðskiptadag með minnst eins dags fyrirvara. Arion banki hefur umsjón með því ferli að fá hlutabréfin tekin til viðskipta.

Listi yfir 20 stærstu hluthafa N1 verður birtur fyrir opnun markaða fyrsta viðskiptadags félagsins.