Bæta þarf verklag og auka kröfur við gerð ívilnunarsamninga um nýfjárfestingar, mat á umhverfisáhrifum framkvæmda og útgáfu starfsleyfa. Þetta er meðal þess sem kemur fram í nýrri úttekt Ríkisendurskoðunar sem ber heitið: Kísilverksmiðja Sameinaðs Sílikons hf. – Aðkoma og eftirlit stjórnvalda, en hún var unnin að beiðni Alþingis.
Í skýrslunni er alls sjö ábendingum beint til atvinnuvega- og nýsköpunarráðuneytis, umhverfis- og auðlindaráðuneytis, Skipulagsstofnunar, Umhverfisstofnunar og Vinnueftirlits ríkisins.
Mikilvægt er að stofnanir ríkisins sem koma að útgáfu starfsleyfa og gerð ívilnunarsamninga geti sannreynt getu þeirra sem sækjast eftir því að starfrækja mengandi iðnað til að uppfylla skilyrði slíks rekstrar og sanngildi þeirra upplýsinga sem þeir leggja fram.
Ríkisendurskoðun telur brýnt að umhverfis- og auðlindaráðuneyti kanni, í samstarfi við Umhverfisstofnun og önnur stjórnvöld, hvort herða þurfi eða skýra kröfur við útgáfu starfsleyfa vegna starfsemi sem getur haft mengun í för með sér.
