Fjármálaráðuneytið telur ekki æskilegt að stíga enn hraðari skref til rýmkunar heimilda lífeyrissjóða til erlendra fjárfestinga að svo stöddu, m.a. þar sem „spár um ytri stöðu þjóðarbúsins [hafa] dökknað og aðgengi hagkerfisins að erlendu fjármagni versnað“. Þetta kemur fram í minnisblaði sem fjármálaráðuneytið sendi efnahags- og viðskiptanefnd í gær.

Samkvæmt gildandi lögum má gjaldeyrisáhætta lífeyrissjóða nema að hámarki helmingi eigna þeirra. Án afleiðusamninga þýðir þetta að sjóðirnir megi að hámarka fjárfesta 50% af eignum í erlendum gjaldeyri.

Á fyrri hluta síðasta árs kynnti fjármálaráðuneytið áform um að hækka hlutfallið um eitt prósentustig ár hvert þar til það myndi ná 65% árið 2038.

Landssamtök lífeyrissjóða og forsvarsmenn nokkurra lífeyrissjóða gagnrýndu að of hægt væri farið í að rýmka heimildir sjóðanna til fjárfestinga erlendis. Ráðuneytið brást við með því að leggja til að innleiðingarferlinu yrði hraðað.