Eins og venja er má finna fjölmargar atvinnuauglýsingar í þar til gerðum sérblöðum með helgarblöðum Morgunblaðsins og Fréttablaðsins.
Hér má finna lauslega, en þó ekki tæmandi, umfjöllun um helstu atvinnuauglýsingar helgarinnar.
Þar má meðal annars finna auglýsingu frá Eldfjallahúsinu sem leitar að framkvæmdastjóra auk þess sem heildsalan Ásbjörn Ólafsson ehf. leitar að markaðsfulltrúa. Þá leitar Samskip að forstöðumanni innflutningsdeildar sem ber ábyrgð á sölu- og markaðsstefnu deildarinnar eins og fram kemur í auglýsingunni.
Tryggingafélagið VÍS er að leita verkefnastjóra þjónustumála sem hefur umsjón með þjónustugæðum í fyrirtækinu í heild. Þá leitar Fjárvakur, dótturfélag Icelandair Group, að verkefnastjóra í upplýsingatæknideild en auk þess starfsmanni í endurgreiðsludeild.
Ríkisfyrirtækið Isavia, sem áður hét Flugstoðir, auglýsir fjórar lausar stöður í atvinnublöðum helgarinnar. Þannig leitar Isavia að markaðsstjóra, sérfræðing í mannauðsmálum, verk- eða tæknifræðing og loks deildarstjóra eignaumsýslu.
Þá leitar lögfræðistofan BBA eftir lögmanni og lyfjaframleiðandinn Actavis leitar að sérfræðing í skjalastjórnun og tæknimanni á tæknideild sem hefur eftirlit með tækjabúnaði og fleira. Reiknistofa Bankanna leitar að fjármálastjóra og risabakaríið Myllan leitar að starfsmanni í vöruþróun.
Loks má nefna að Vélaverkstæði Hjalta Einarssonar, sem er einn stærsti þjónustuaðili Fjarðaáls, leitar að véltæknifræðing, vélaverkfræðing, vélfræðing, vélstjóra eða vélvirkja á tæknideild fyrirtækisins á Reyðarfirði.
Sem fyrr segir er hér aðeins stiklað á stóru úr atvinnublöðum helgarinnar.
