*

laugardagur, 12. júní 2021
Fólk 10. maí 2021 16:48

Þóra nýr fjármálastjóri PLAY

Þóra Eggertsdóttir hefur verið ráðin framkvæmdastjóri fjármálasviðs Play en hún kemur til félagsins frá Icelandair.

Ritstjórn
Þóra Eggertsdóttir, framkvæmdastjóri fjármálasviðs Play.
Aðsend mynd

Þóra Eggertsdóttir hefur verið ráðin framkvæmdastjóri fjármálasviðs Play. Hún mun bera ábyrgð á að byggja upp fjármálasvið félagsins sem og að leiða skráningu Play á Nasdaq First North Iceland markaðinn. Þóra kemur frá Icelandair og tekur til starfa á næstu dögum. Þetta kemur fram í tilkynningu.

Þóra hefur víðtæka alþjóðlega reynslu og hefur starfað og stundað nám í London, Barcelona og Tokyo. Hún hefur 17 ára reynslu af störfum tengdum fjármálum, rekstri og stjórnun.

Nú síðast starfaði Þóra sem forstöðumaður innanlandsflugs hjá Icelandair, en áður var hún fjármálastjóri og forstöðumaður upplýsingatækni og stafrænnar þróunar hjá Air Iceland Connect. Þóra var forstöðumaður áhættu- og fjárstýringar hjá Landsneti á árunum 2012 - 2017 og vann einnig við fjárstýringu hjá Landic Property. Áður starfaði Þóra um nokkurra ára skeið hjá Morgan Stanley í Tokyo.

 „Flugrekstur er einstaklega heillandi. Ég hef mikla trú á þeirri hugmyndafræði sem eigendur og forstjóri Play hafa sett fram og hlakka til þess að taka þátt í framtíðaruppbyggingu félagsins. Ferðaþjónusta er öflug og ég er sannfærð um að hún muni blómstra á ný eftir þessa krefjandi tíma." segir Þóra í tilkynningunni.

Birgir Jónsson, forstjóri Play, er gríðarlega ánægður með að fá Þóru inn í stjórnunarteymið. „Það er sannarlega mikill fengur fyrir Play að fá Þóru til starfa. Hún hefur öflugan alþjóðlegan bakgrunn í fjármálum og rekstri og þekkir auk þess vel til flugreksturs. Play mun vaxa hratt á næstunni og þá skiptir lykilmáli að teymið sem stýrir félaginu sé samhent og öflugt. Þóra mun einnig leika stórt hlutverk hjá okkur í tengslum við skráningu félagsins á hlutabréfamarkað nú á næstunni og ég veit að hún mun smellpassa inn í þann öfluga hóp starfsmanna sem nú þegar er að störfum hjá Play," segir Birgir í tilkynningunni.

Þóra er viðskiptafræðingur með löggildingu í verðbréfaviðskiptum. Hún er með mastersgráðu í markaðsfræðum frá viðskiptaháskólanum EADA í Barcelona og MBA frá HR. Þóra er gift Bjarna Erni Kærnested, forstöðumanni hjá Össuri og eiga þau tvö börn. Þóra hefur alla tíð haft mikinn áhuga á íþróttum og keppti m.a. í golfi á yngri árum. Hún hefur einnig gaman af fjallgöngu, skíðum, badminton og ferðalögum.