*

fimmtudagur, 2. desember 2021
Fólk 10. nóvember 2021 12:24

Þór­oddur leiðir hug­búnaðar­þróun Sessor

Þóroddur Björgvinsson, fyrrum vörustjóri hjá Exigo og Advania, hefur verið ráðinn sviðsstjóri hugbúnaðarlausna hjá Sessor.

Ritstjórn
Þóroddur Björgvinsson
Aðsend mynd

Sessor hefur ráðið til sín Þórodd Björgvinsson sem sviðsstjóra hugbúnaðarlausna þar sem hann mun leiða uppbyggingu á hugbúnaðarlausnum félagsins.

Þóroddur hefur reynslu á sviði upplýsingatæknimála og m.a. stýrt þróun á þekktum lausnum eins og Bakverði. Hann starfaði áður sem verkefna- og vörustjóri hjá Exigo og þar á undan hjá Advania sem vörustjóri og hugbúnaðarsérfræðingur. Þóroddur er með B.Sc. gráðu í vélaverkfræði frá Háskóla Íslands.

„Þetta er gríðarlega skemmtilegt tækifæri hjá framsæknu og spennandi fyrirtæki með skýra sýn á upplýsingatækni og það hvernig hún verði best nýtt viðskiptavinum til hagsbóta. Ég hlakka til að takast á við spennandi verkefni hjá Sessor," er haft eftir Þóroddi Björgvinssyni.

„Sessor býður fyrirtækjum uppá sérfræðiþjónustu í upplýsingatækni og stoðþjónustum. Það er því mikill fengur að fá Þórodd til liðs við okkur en með öflugri uppbyggingu á sérhæfðum hugbúnaðarlausnum náum við að auka enn frekar árangur viðskiptavina okkar,“ segir Brynjar Gunnlaugsson, framkvæmdastjóri Sessor.

Sessor er óháð ráðgjafar-og þjónustufyrirtæki í upplýsingatækni og stoðþjónustum sem leggur áherslu á að auka sjálfvirkni, bæta rekstraröryggi og lækka heildarrekstrarkostnað fyrirtækja.