Til sölu er þorpið Aladdin í Wyoming fylki í Bandaríkjunum. Þorpið samanstendur af fimmtán byggingum, m.a. 118 ára gamalli verslun sem enn er í rekstri. Nú er það til sölu í heild sinni fyrir 1,5 milljón dala, eða um 173 milljónir króna.
Fram kemur í frétt Gillette News-Record að hjónin Rick og Judy Brengle hafi keypt þennan smábæ fyrir 28 árum en vilji nú selja hann. Judy segir að maðurinn hennar hafi keypt þennan stað eftir að öll börnin þeirra voru flogin úr hreiðrinu og Judy fann fyrir tómarúmi í lífi sínu.
Fimmtán manns búa í þorpinu, en þar er engin sérstök sveitarstjórn sökum smæðar. Heildarstærð þorpsins eru 30 ekrur.
Þetta er ekki í fyrsta sinn sem þorp er til sölu í Wyoming. Í fyrra seldist smábærinn Buford, þar sem einungis einn maður bjó, fyrir 900.000 dali. eða um 103 milljónir króna.
