Helga Ólafsson og hópur fjárfesta er með í bígerð að framleiða hárvatni úr íslensku vatni sem sett er í hár áður en meðferð hefst. Hárvatnið hefur verið í rannsóknum og undirbúningi í þrjú ár.
„Við notum íslenska vatnið og setjum í það vítamínbætta formúlu. Það er fyrir hárgreiðslumeistara og einstaklinga og gerir kraftaverk. Það má ekki gleyma því að úti í hinum stóra heimi er vatnið hræðilegt. En við höfum þetta yndislega vatn. Þetta gerir hvorki húð né hárinu gott. Þegar kalda vatnið kemst í snertingu við hárið þá mýkist það. Þetta er búið að fara í gegnum mikla rannsóknarvinnu og nú erum við að fara í framleiðslu,“ segir Helga.
Íslenska vatnið í hárinu á Halle Berry
Hún segist hafa gert sér fyllilega grein fyrir kostum íslenska vatnsins í hár þegar franski snyrtivörurisinn Christian Dior valdi vatn Icelandic Glacial í snyrtivörur sínar.
„Fólk kaupir sér oft krem og í þeim eiga að vera hreinustu efni sem til eru og vera góð fyrir húðina. En fáir vita hvaða vatn er notað. Þessi krem eru að stórum hluta vatn og því mikilvægt að það sé gott,“ segir Helga. Nokkrir hárgreiðslumeistarar eru búnir að vera með þetta á borðinu hjá sér og prófa það. Þar á meðal er Nico, hárgreiðslumeistari Halle Berry. „Hún er yfir sig ánægð með hárvatnið og segir það gera hárinu gott,“ segir Helga stolt af hárvatninu. Vatnið er ekki ætlað fyrir íslenskan markað. Helga segir það augljóst: Þeir sem búa hér þurfa ekki á því að halda. „Þið fáið vatnið úr krananum!“
Ítarlegt viðtal er við Helgu Ólafsson í síðasta tölublaði Viðskiptablaðsins. Þar ræðir hún m.a. um fortíðina og þau mörgu verkefni sem hún er með í bígerð. Áskrifendur geta nálgast blaðið undir liðnum tölublöð hér .