Kristrún Frostadóttir, oddviti Samfylkingarinnar í Reykjavík suður, gagnrýnir ummæli Ásgeirs Jónssonar seðlabankastjóra um að stefna Reykjavíkurborgar í skipulagsmálum hafi leitt til hækkunar á fasteignaverði á höfuðborgarsvæðinu og segir aðgerðir Seðlabankans hafi spilað stærri þátt.
„Þú hlýtur að vera að grínast. Það er eitt að lækka vexti. Annað að ýta undir mörg hundruð milljarða útlán til heimila í sértækri atvinnukreppu. Þegar ég vakti athygli á þessu í nóv. var gagnrýninni ýtt til hliðar. Nú er skipulagsmálum kennt um skammtímahreyfingar á fasteignamarkaði," segir Kristrún í Twitter færslu.
Telur framboð lóða vera til staðar
Í gær tilkynnti Fjármálastöðugleikanefnd Seðlabankans frá því að veðsetningahlutfallið yrði lækkað úr 85% í 80% . Í samtali við Fréttablaðið í dag segir seðlabankastjóri að þetta hefði verið gert til þess að komast hjá því að hækka vexti. Hann bætir við að ekki hefði þurft að lækka hlutfallið hefði betur verið haldið á spöðunum við uppbyggingu húsnæðis í Reykjavík.
„Það liggur alveg fyrir, sama hvernig menn snúa því fram og til baka, að sú ákvörðun Reykjavíkurborgar að brjóta ekki nýtt land undir ný hverfi, hefur áhrif á fasteignaverð í allri borginni. En vitaskuld er nægjanlegt rými fyrir nýtt húsnæði til staðar á þéttingarreitum innan borgarinnar - það bara tekur lengri tíma að koma þeim í gagnið. Við gætum horft fram á eitt eða tvö ár þar sem heldur hægir á framboði af nýjum eignum," segir Ásgeir við Fréttablaðið.
„Aftur á móti held ég að framboð fasteigna verði ekki vandamál þegar litið er lengra fram, vegna þess að nægt land er til staðar og verktakabransinn mun taka við sér. Við erum að örva framboð fasteigna með því að halda vöxtum lágum, enda fjármagna verktakar sig gjarnan á breytilegum vöxtum"
Segir hækkun húsnæðisverðs ekki vera vegna þéttingarstefnu
Kristrún gagnrýnir aðgerðir seðlabankastjóra og segir framboð húsnæðis vera seigfljótandi en að eftirspurn geti hins vegar breyst hratt eftir því hversu mikið aðgengi er að fjármagni. „Í stað þess að ráðast snemma í sértækar aðgerðir fyrir einstaklinga og fyrirtæki í tekjustoppi var ákveðið að pumpa upp kerfið með aukinni skuldsetningu allra. Það einfaldlega stenst ekki að 14% hækkun húsnæðisverðs á nokkrum mánuðum sé allt í einu vegna þéttingarstefnu Reykjavíkurborgar."
Hún telur það óskhyggju ef að seðlabankastjóri telur að aukið framboð á lóðum leiði til þess að aðilar í uppbyggingu á fasteignum fari að selja eignir undir markaðsvirði og bætir við að það sé skammsýni að „þenja út alla byggð."
„Það sem breyttist í fyrra var mörg hundruð milljarða aukning fjármagns sem rann í gegnum bankakerfið og beint inn á fasteignamarkaðinn. Það er eðlilegt að endurskoða aðgerðir, enginn gerir þá kröfu að allt gangi upp. Að endurskrifa söguna og horfa fram hjá stærstu breytunni á fasteignamarkaði í fyrra er allt annað mál. Klassískt dæmi um hvernig óbeinar efnahagsaðgerðir geta brenglað allt kerfið."
Twitter færslu Kristrúnar er hægt að lesa í heild sinni hér að neðan.
Þú hlýtur að vera að grínast. 1/8👇
— Kristrún Frostadóttir (@KristrunFrosta) July 1, 2021
„Aðspurður segir Ásgeir að lækkun veðsetningarhlutfallsins dragi úr þörf á að hækka vexti. Hins vegar hefði verið hægt að komast hjá því að lækka hlutfallið ef betur hefði verið staðið að uppbyggingu íbúðarhúsnæðis.“ https://t.co/7DV7M4kOlU