Reynir Traustason, ritstjóri DV, og Ingi Freyr Vilhjálmsson, fréttastjóri DV, þurfa að greiða Jóni Þorsteini Jónssyni, fyrrverandi stjórnarformanni Byrs, samtals 2 milljónir króna, samkvæmt dómi Héraðsdóms Reykjavíkur í dag. Þar af eru 300 þúsund krónur í miskabætur, 400 þúsund krónur til að standa straum af birtingu dóms og forsendna hans og 1366 þúsund krónur í málskostnað. Þetta kemur fram í dómnum, sem VB hefur undir höndum.
Eftir að umfjöllunin birtist í DV í nóvember í fyrra stefndi Jón Þorsteinn DV ehf., Reyni Traustasyni og Inga Frey Vilhjálmssyni vegna umfjöllunar blaðsins um meint mörg hundruð milljóna króna gjaldeyrisviðskipti Jóns Þorsteins. Jón Þorsteinn krafðist þriggja milljóna króna í skaðbætur.
Dómari dæmdi eftirfarandi ummæli á forsíðu blaðsins 12. og 13. nóvember í fyrra dauð og ómerk. Þau voru:
- Laumaði stórfé úr landi.
- Dulbúið sem lánaviðskipti.
- Hundruð milljóna millifærð.
Þá voru eftirtalin ummæli á blaðsíðu 8 í blaðinu 12.-13. nóvember dæmd dauð og ómerk:
- Jón Þorsteinn Jónsson hefur staðið í hundruð milljóna fjármagsflutningum frá Íslandi á síðastliðnum árum í tráissi við gjaldeyrishaftalögin
- Hefur flutt hundruð milljóna úr landi.
- Þegar fjármunirnir eru komnir frá Íslandi og inn á erlenda bankareikninga greiðir lántakandinn peningana aftur til lánveitandas.
- Jón Þorsteinn Jónsson fyrrverandi stjórnarformaður Byrs og einn af erfingjum Nóatúns á sínum tíma, hefur flutt mörg hundruð milljónir króna í erlendum gjaldeyri frá Íslandi á þessu ári og því síðasta.
- Eini tilgangurinn með viðskiptunum er að koma gjaldeyri út úr landinu í trássi við höftin þó svo að viðskiptin sé(u) skilgreind sem lán.
