Norðlenska félagið Circle air er að fá til sín fjórar þyrlur frá austurríska féalginu Heli-Austria til landsins að því er félagið segir á facebook síðu sinni. Verða þyrlurnar ætlaðar fyrir bæði þyrluskíðamennsku og útsýnisflug, sem Circle air hefur boðið upp á frá Akureyrarflugvelli.
Eins og Viðskiptablaðið fjallaði um í desember bjóst Þorvaldur Lúðvík Sigurjónsson framkvæmdastjóri Circle Air við því að fá allt að sex þyrlur til landsins, yfir háannatímann sem er frá febrúar fram í júní, en jafnframt býst hann við að einhverjar verði áfram allt árið, þó það velti á eftirspurn.
„Það fer eftir fjölda flugstunda sem óskað er eftir hve margar þær verða þegar uppi er staðið. Það hefur verið mikill uppgangur í útsýnisferðum í Reykjavík með þyrlum en það hefur aldrei verið í boði fyrir norðan. Það hefur alltaf kostað ferjun á þyrlum norður til þess sem kaupandinn þarf að greiða fyrir,“ sagði Þorvaldur þá í samtali við Viðskiptablaðið í tilefni af samstarfsamningi félagsins við austurríska félagið.
„Þeir gera þetta sama í Austurríki, eru í fjallaskíðamennsku, útsýnisflugi auk þess að vera stórir aðilar í neyðarþjónustu. Þyrlur þeirra hafa mikla breidd, bæði búnað fyrir þyrluskíðamennskuna, neyðarflutninga og svo er hægt að nota þessar þyrlur í ýmis konar þungavinnu í verklegum framkvæmdum.“
