Falsfréttir á félagsmiðlum hafa verið mikið til umfjöllunar síðastliðin misseri, þótt ekki séu allir á sama máli um eiginlega skaðsemi þeirra og trúgirni almennings á þær.

Í Bandaríkjunum hefur komið til tals að beita lagasetningu gegn falsfréttum, en könnun Pew-stofnunarinnar vestra bendir til þess að almenningur sé vantrúaður á svo harkalegar aðgerðir, enda sé sjálft tjáningarfrelsið í húfi, og ýmsar hættur á að slíkum lagaheimildum yrði misbeitt. Tjáningarfrelsið þurfi að njóta vafans. Aftur á móti telur meirihlutinn að tæknirisar á borð við Facebook og Twitter þurfi að gera meira til þess að halda aftur af bullinu.