Íslendingar leiða alþjóðlega risarannsókn á sviði gervigreindar og hljóta hundruð milljóna styrk frá Evrópusambandinu   Tölvunarfræðideild Háskólans í Reykjavík hefur verið úthlutað 2ja milljóna Evra styrk úr 7. rammaáætlun Evrópusambandsins að andvirði um 300 milljónir íslenskra króna til gervigreindarrannsókna.

Þetta kemur fram í tilkynningu frá HR í dag en þetta er langhæsti styrkur veittur íslenskum aðilum til rannsókna í tölvunarfræðum og jafnframt hæsti rannsóknarstyrkur sem veittur hefur verið vísindamönnum við HR.

Þá kemur fram að skólinn kemur til með að leiða þriggja ára rannsóknarverkefni á gervigreind, í samstarfi við breskt fyrirtæki og fjóra evrópska háskóla. Styrkurinn er veittur til rannsókna á grunntækni gervigreindar og er takmark þeirra að þróa nýjar aðferðir við gerð gervigreindra vitvera sem geta numið flókið atferli og lært án beinnar íhlutunar forritara.

Dr. Kristinn R. Þórisson, dósent við tölvunarfræðideild Háskólans í Reykjavík, er hugmyndasmiður og upphafsmaður þessarar rannsóknar og kemur til með að leiða rannsóknarstarf háskólanna fimm.

Hann segir að í verkefninu verði smíðuð ný tegund hugbúnaðar, gædd sjón og heyrn, sem getur fylgst með hegðun fólks með því að hlusta og horfa.

Forritið mun stýra „sýndarvélmenni“ sem smám saman lærir upp á eigin spýtur að herma eftir mannlegri hegðun og þroskast í bæði hegðun og hugsun. Vonast rannsóknarhópurinn til að verkefnið leiði til verulegra framfara á því sviði sem nefnt hefur verið „almenn gerivigreind” (e. artificial general intelligence).

Samstarfsskólar Háskólans í Reykjavík í þessari gervigreindarrannsókn eru Scuola Universitaria Professionale Della Svizzera Italiana í Sviss, Università degli Studi di Palermo og National Research Council á Ítalíu og Universidad Politécnica de Madrid á Spáni. Einnig kemur breska fyrirtækið Communicative Machines Limited að verkefninu.