*

sunnudagur, 18. apríl 2021
Innlent 22. apríl 2014 10:05

Tölvutek sektað um 500 þúsund

Í bæklingi Tölvuteks var ekki tekið fram hve mikill afsláttur af vörum var gefinn.

Ritstjórn

Neytendastofa hefur lagt 500 þúsund krónur í stjórnvaldssekt á Tölvutek ehf. fyrir brot á útsölureglum.

Neytendastofa fór fram á skýringar fyrirtækisins á því af hverju fyrra verð vara í bæklingi Tölvuteks sem bar yfirskriftina „DESEMBER TILBOГ kæmi ekki fram. Þegar vara er auglýst á tilboði verður að tilkynna fyrra verð hennar samhliða tilboðsverði.

Í svörum frá fyrirtækinu kom fram að bæklingurinn sé hvorki útsölubæklingur né stillt upp sem lækkun á vöruverði. Ekkert í bæklingnum gefi til kynna að um útsölu, afslátt eða lækkað verð sé að ræða þó svo að fjöldi vara í bæklingnum sé á lækkuðu verði.

Á vef Neytendastofu segir að ekki hafi verið fallist á rök Tölvuteks. Í útsölureglum sé tilboð skilgreint sem sala þar sem um verðlækkun sé að ræða og með yfirskrift bæklingsins var neytendum gefið til kynna að verð væri lækkað. Var fyrirtækinu bannað að auglýsa vörur sem ekki eru á lækkuðu verði á tilboði og beitt stjórnvaldssekt.

Stikkorð: Tölvutek