Tómas Már Sigurðsson, sem hefur verið forstjóri Alcoa í Evrópu og Mið-Austurlöndunum, mun færast upp innan fyrirtækisins og taka við sem framkvæmdastjóri framleiðslu Alcoa á heimsvísu. Þetta er hluti af stærri uppstokkun á stjórnendateymi fyrirtækisins, en forveri Tómasar mun taka við sem aðstoðarforstjóri samsteypunnar. Þessu greinir Morgunblaðið frá.
Tómas mun heyra beint undir forstjóra framleiðslu Alcoa, Bob Wilt, en hann verður með starfsstöðvar í New York í Bandaríkjunum. Hans helstu verkefni verða að sjá um daglegan rekstur á álbræðslum, álvinnslum og báxítframleiðslu Alcoa um allan heim. Þá verður Tómas hluti af framkvæmdaráði fyrirtækisins.
Breytingin hefur verið kynnt innan fyrirtækisins en enn á eftir að gefa út formlega tilkynningu um breytinguna.
Tómas hefur starfað hjá Alcoa síðan árið 2004, hann hóf störf hjá Alcoa Fjarðaráli það árið, en var árið 2011 ráðinn sem forstjóri Alcoa í Evrópu með aðsetur í Genf. Hann hafði jafnframt yfirstjórn álframleiðslusviðs (e. Global Primary Products) Alcoa í álfunni.
Tómas lauk prófi frá Háskóla Íslands í verkfræði og fékk mastersgráðu í framkvæmdaáætlun frá Cornell háskólanum í Bandaríkjunum árið 1995.