Framkvæmdir við Vaðlaheiðargöng eru að mestu leyti fjármagnaðar með 8,7 milljarða króna láni ríkissjóðs til félagsins Vaðlaheiðarganga hf. sem samþykkt var með lögum árið 2012. Í viðskiptaáætlun félagsins er gert ráð fyrir að það geti endurfjármagnað sig árið 2018 með útgáfu verðtryggðs skuldabréfs með 3,7% raunvöxtum.
Í greinargerð vegna lánveitingarinnar úr ríkissjóði var hins vegar lýst yfir efasemdum um að það geti gengið eftir og vakin athygli á því að hár vaxtakostnaður geti grafið undan rekstrargrundvelli ganganna. Sérstök hætta væri á þessu ef stofnkostnaður yrði umfram áætlun.
Í samtali við Viðskiptablaðið segja stjórnendur Vaðlaheiðarganga hf. að sú verði líklega raunin. Í lánasamningi ríkissjóðs og Vaðlaheiðarganga er kveðið á um að Vaðlaheiðargöng hf. geti óskað eftir framlengingu lánsins ef ekki næst að endurfjármagna það á viðunandi kjörum. Slík framlenging geti farið fram einu sinni eða oftar. Kjör framlengds láns muni fara eftir þeim kjörum sem ríkissjóður nýtur auk hæfilegs vaxta álags út frá markmiðum um rekstur ganganna.
Nánar er fjallað um málið í Viðskiptablaðinu. Áskrifendur geta nálgast pdf-útgáfu af blaðinu með því að smella á hlekkinn Tölublöð .
