Donald Trump Bandaríkjaforseti hefur fyrirskipað 300 dala viðbótargreiðslu til atvinnulausra á viku, rúmar 40 þúsund krónur, eftir að 600 dala viðbót vegna heimsfaraldurs kórónuveirunnar rann út um síðustu mánaðarmót. Wall Street Journal segir frá .
Tilskipun Trump heimilaði 400 dala greiðslu á viku, en veitir fylkjunum aðeins fjármagn fyrir 300. Hann hvatti fylkjayfirvöld þó til að nýta heimildina og fjármagna þá 100 dali sem upp á vantaði sjálf.
Greiðslan er til viðbótar við hefðbundnar atvinnuleysisbætur og hefur sem fyrr segir numið 600 dölum á viku frá því faraldurinn braust út, en ekki náðist samkomulag í þinginu um að framlengja úrræðið áður en það rann út.
Andstæðingar framlengingar bentu helst á að greiðslurnar hefðu letjandi áhrif á atvinnuleit, en fylgjendur bentu á mikil áhrif faraldursins og sóttvarnarúrræða gegn honum bæði á þá sem misst hafa vinnuna, og efnahagslífið almennt.
Trump sagði markmiðið með því að greiða aðeins 300 dali nú í stað 600 vera að hvetja fólk til að snúa aftur til vinnu.
