Donald Trump, forseti Bandaríkjanna kallaði eftir því að peningastefnunefnd Seðlabanka Bandaríkjanna myndi lækka stýrivexti enn frekar í færslu á Twitter síðu sinni en fyrr í dag voru voru þeir lækkaðir um hálft prósentustig til þess að bregðast við efnahagslegum áhrifum vegna útbreiðslu kórónuveirunnar.
Í færslunni segir Trump að Seðlabankinn sé að lækka vexti en verði að veita hagkerfinu meiri slaka og það sé mikilvægt að peningastefnan verði í samræmi við það sem gengur og gerist í öðrum löndum.
„Við erum ekki að spila á jafningjagrundvelli. Þetta er ekki sanngjarnt fyrir Bandaríkin. Það er kominn tími á að seðlabankinn taki forystuna. Meiri slaka og meiri vaxtalækkanir.“
Þrátt fyrir að forsetar Bandaríkjanna hafa sögulega forðast að skipta sér að peningastefnu landsins hefur Trump marg oft tjáð sig um hana. Á síðustu árum hefur hann bæði sagt vexti í landinu of háa og of lága auk þess sem hann sagði fyrir nokkrum dögum að lækka þyrfti vexti um heilt prósentustig til þess að bregðast við efnahagsáhrifum kórónuveirunnar.
The Federal Reserve is cutting but must further ease and, most importantly, come into line with other countries/competitors. We are not playing on a level field. Not fair to USA. It is finally time for the Federal Reserve to LEAD. More easing and cutting!
— Donald J. Trump (@realDonaldTrump) March 3, 2020
