Níu stjórnendur Kviku banka áttu tugmilljóna króna viðskipti með hlutabréf bankans í dag, en nokkrir þeirra voru að nýta áskriftarréttindi með um þrefalt lægra kaupgengi en núverandi hlutabréfaverð Kviku. Þetta kemur fram í tilkynningu til kauphallarinnar í dag.
Marinó Örn Tryggvason, forstjóri Kviku, seldi 2 milljónir hluta í félaginu fyrir rúmar 44,9 milljónir króna. Hann nýtti áskriftarréttindi fyrir tvöfalt stærri hlut, 4 milljónir hluta, sem hann keypti fyrir 28,1 milljón króna á genginu 7,03 en til samanburðar er gengi Kviku 22,4 í dag.
Hlutabréfagengi Kviku hefur meira en þrefaldast frá því í byrjun Covid þegar það fór neðst í 7 krónur á hlut en hefur hækkað verulega eftir að tilkynnt var um samrunann við TM.
Viðskiptin koma í kjölfarið á uppgjöri Kviku sem var birt eftir lokun markaða í gær. Hið sameinaða félag, Kviku, TM og Lykils, skilaði 2,5 milljarða króna hagnaði á fyrsta fjórðungi ársins .
Tilkynnt var um viðskipti eftirfarandi stjórnenda í dag:
- Marínó Örn Tryggvason, forstjóri Kviku
- Ármann Þorvaldsson, aðstoðarforstjóri
- Thomas Skov Jensen, forstöðumaður áhættustýringar
- Ragnar Páll Dyer, framkvæmdastjóri fjármálasviðis
- Lilja Rut Jensen, yfirlögfræðingur
- Halldór Karl Högnason, forstöðumaður fjárstýringar
- Baldur Stefánsson, framkvæmdastjóri fyrirtækjaráðgjafar
- Magnús Ingi Einarsson, framkvæmdastjóri bankasviðs
- Bjarni Eyvinds Þrastarson, framkvæmdastjóri markaðsviðskipta
