Rúmum tveimur árum munar á meðalaldri þings og þjóðar. Munurinn var tæp 12 ár árið 1874 en hefur smám saman farið minnkandi síðan. Þetta á við þegar horft er til meðaldurs kosningabærra Íslendinga en sé þjóðin öll höfð með eykst munurinn eðlilega og er í dag um 17 ár. Þetta kemur fram í athugun Viktors Orra Valgarðssonar, meistaranema í stjórnmálafræði við Háskóla Íslands.
Þingið sem kjörið var árið 2009 er yngsta þing sem þjóðin hefur haft síðan árið 1900 og er meðalaldur þingmanna nú 47,2 ár. Viktor Orri hefur einnig skoðað mun á hlutfalli kvenna á þingi miðað við þjóðina og hefur sá munur hríðfallið á síðustu árum, eða úr um 45% árið 1979 í 6,4% árið 2009.
