Gert er ráð fyrir að um 250 manns muni koma að byggingu Bitruvirkjunar, verði ráðist í þá framkvæmd, og að til viðbótar muni um 100 manns koma að hönnun hennar og ýmiss konar ráðgjöf.
Þetta segir Eiríkur Hjálmarsson, upplýsingafulltrúi Orkuveitu Reykjavíkur, í samtali við Viðskiptablaðið í dag.
Hann segir að virkjunin muni kosta á bilinu 18 til 20 milljarða króna.
Enn hefur engin ákvörðun verið tekin um byggingu virkjunarinnar en rannsóknar- og undirbúningsvinnu var frestað í maí sl. með ákvörðun stjórnar OR.
Líklegt má telja að nýr meirihluti sjálfstæðismanna og framsóknarmanna í borginni setji þá vinnu af stað aftur. Verði í kjölfarið ákveðið að ráðast í byggingu virkjunarinnar má gera ráð fyrir að framleiðslan fari í gang í lok árs 2013.
Bitruvirkjun er allt að 135 MW jarðvarmavirkjun í Sveitarfélaginu Ölfusi og Grímsnes- og Grafningshreppi.
______________________________________
Nánar er fjallað um málið í Viðskiptablaðinu í dag. Áskrifendur geta lesið blaðið á pdf-formi hér á vefnum. Þeir áskrifendur sem ekki hafa sótt um aðgangsorð til að lesa blaðið á vefnum geta gert það hér .
