Lokuðu útboði til fjárfesta á breytanlegum skuldabréfum útgefnum af CCP hf. lauk á miðvikudaginn. Í boði voru bréf að fjárhæð 15 milljónir dala og bárust áskriftir fyrir USD 26,3 milljónum eða rúmlega 75% umfram þá fjárhæð sem í boði var. Í tilkynningu frá fyrirtækinu segir að með hliðsjón af umframáskrift og mikilli þátttöku innlendra stofnanafjárfesta hafi stjórn CCP hf. ákveðið að nýta að fullu heimild frá hluthafafundi til að hækka útboðsfjárhæðina í USD 20 milljónir.
Í tilkynningunni er haft eftir Hilmari Veigari Péturssyni, forstjóra CCP, að það sé sérstaklega ánægjulegt að finna fyrir miklum stuðningi við félagið af hálfu innlendra lífeyrissjóða og annarra stofnanafjárfesta nú þegar fyrir höndum sé næsta stóra skref í vexti félagsins. Hann segist meðvitaður um að þetta er fyrsta skuldabréfaútgáfa á innanlandsmarkaði í langan tíma, ef frá er talin útgáfa opinberra aðila og orkufyrirtækja, og geri ráð fyrir að þetta sé vísbending um að íslenskur fjármálamarkaður sé áhugasamur um að styðja við önnur fyrirtæki sem fylgt geti fordæmi CCP. Einnig segist hann stoltur af því að hafa sýnt fram á að mögulegt er að byggja upp áhugaverða og fjölbreytta fjárfestingarkosti á Íslandi í fleiri atvinnugreinum en þeim sem byggja á okkar verðmætu náttúruauðlindum„
Stefnt er að því að skuldabréfin verði tekin til viðskipta í kauphöll Nasdaq OMX á Íslandi á næstunni. Ráðgjöf og umsjón með útboðsferlinu var í höndum Arctica Finance hf.
