Hlutur skatta í bensínverði hérlendis er 50,2%. Hlutfall skatta af verði á díselolíu er 46,5%, samkvæmt gögnum sem fjármálaráðuneytið hefur tekið saman. Í samanburði við Noreg, Danmörku og Svíþjóð er hlutur ríkisins af verði bensíns lægst hérlendis.

Norska ríkið tekur til sín 52,5% af verði bensíns, það danska fær 54,9% og sænska 59,1%. Íslenska ríkið tekur álíka mikið af verði díselolíu til sín og Noregur og Danmörk. Þar er hlutur skatta í verði 46,2% og 46,0%. Sænska ríkið fær hinsvegar 56,4% af verði díselolíu.

Fjármálaráðuneytið bar einnig saman verð á bensíni og díselolíu á Íslandi við verð í öðrum Evrópuríkjum. Mælt er í krónum. Samkvæmt úttektinni er verðið hérlendis það níunda lægsta af alls 22 löndum. Listann má sjá hér að neðan.

Fjallað var um olíuverð á Alþingi í gær og spurði Tryggvi Þór Herbertsson, þingmaður Sjálfstæðisflokksins,  hvort stjórnvöld ætli að bregðast við hratt hækkandi verði. Steingrímur J. Sigfússon fjármálaráðherra sagði það koma til greina ef hækkanir haldi áfram. Hann greindi einnig frá samanburði fjármálaráðuneytisins. Í umræðum á Alþingi í gær sagði Tryggvi Þór að gögn um samanburð væru góð og gild, en réttast væri að líta einnig til kaupmáttar þegar verð milli landa eru borin saman.

Verð bensíns og díselolíu (kr./lítra)

Land                Bensín                         Dísel

Noregur            281,1                273,8

Holland             264,3                217,9

Danmörk          257,7                235,9

Belgía              248,4                221,1

Svíþjóð             247,6                251,4

Stóra-Bretland  244,3                253,8

Portúgal           242,0                219,4

Finnland           238,7                209,9

Frakkland         237,0               211,5

Ítalía                 235,5                216,2

Þýskaland        235,5                216,2

Írland                230,8                222,6

Slóvakía           222,6                205,0

Ísland               221,5                226,4

Tékkland          219,2                214,5

Ungverjaland    215,7                209,7

Sviss               212,1                224,6

Austurríki          206,7                205,0

Slóvenía           205,0                198,1

Spánn              205,0                198,6

Lúxemborg       200,7                182,7

Pólland              193,6                187,4