Rúmlega hundrað fjölmiðlamenn komu til Íslands í skipulagðar fjölmiðlaferðir á árinu 2015 og yfir 520 blaðamenn fengu beina aðstoð við að skipuleggja Íslandsferðir sínar. Í kjölfar þess birtust í heildina um 750 greinar í erlendum fjölmiðlum. Umfjöllunin náði til rúmlega 1,3 milljarðs manna og metur Íslandsstofa virði hennar á yfir 84 milljónir evra eða um 11.8 milljarða íslenskra króna.
Þetta kemur fram í ársskýrslu Íslandsstofu þar sem jafnframt segir að stofnunin og almannatengslaskrifstofur á hennar vegum hafi verið í samskiptum við meira en 2600 fjölmiðlamenn á árinu. Sem dæmi um fjölmiðla má nefna New York Times, Al Jazeera, National Geographic, GEO, The Guardian, Elle og Financial Times.
Í samtali við Morgunblaðið segir Inga Hlín Pálsdóttir, forstöðumaður ferðaþjónustu og skapandi greina hjá Íslandsstofu, greinar og umfjallanir í erlendum miðlum áhrifameiri en auglýsingar. Segir hún að blaðagrein sem birtist um landið sé 2,6 sinnum meira virði en auglýsing sem greitt er fyrir.
