Landsvirkjun hefur samið um stækkun á fyrri skuldabréfaútgáfu úr 100 í 150 milljónir Bandaríkjadollara.

Þetta kemur fram í tilkynningu til Kauphallarinnar.

Milligönguaðili er sem fyrr Deutsche Bank og eru kaupendur erlendir fjárfestar. Annað er óbreytt, lánstími er fimm ár og bera skuldabréfin 6,5% fasta vexti.

„Þessi stækkun er mjög jákvæð fyrir Landsvirkjun og endurspeglar góðar viðtökur við fyrra útboði,“ segir Hörður Arnarson, forstjóri Landsvirkjunar í tilkynningunni.

„Það er mjög jákvætt að fá fleiri fjárfesta að borðinu og ljóst að Landsvirkjun hefur tekist að byggja upp traust á fyrirtækinu sem sýnir sig í þessari umframeftirspurn“.

Fram kemur að Landsvirkjun hefur nú aðgang að um 500 milljónum Bandaríkjadollara til að mæta skuldbindingum næstu ára. Fyrirtækið sé nú nálægt því að ljúka langtíma endurfjármögnun miðað við núverandi rekstur.