Rekstrarhagnaður fyrir afskriftir (EBITDA) hjá Origo á síðasta fjórðungi 2021 var á bilinu 490-530 milljónum króna, samkvæmt drögum að uppgjöri. Miðað við það er afkoma félagsins „umtalsvert betri“ en á sama ársfjórðungi 2020 þegar EBITDA hagnaðurinn nam 381 milljón.
„Helstu ástæður eru hærri tekjur og almennt betri afkoma á flestum sviðum en þó sér í lagi í hærri tekjum og sterkri afkomu í sölu á Notendabúnaði,“ segir í afkomuviðvörun sem upplýsingatæknifyrirtækið sendi frá sér fyrir stuttu.
Origo áætlar að hagnaður fyrir fjármagnsliði og skatta (EBIT) verði á bilinu 260-300 milljónir að teknu tillit til væntra afskrifta en til samanburðar nam EBIT hagnaður félagsins 165 milljónum á fjórða ársfjórðungi 2020.
Upplýsingatæknifyrirtækið áréttar að um sé að ræða bráðabirgðamat og niðurstöðurnar geta tekið breytingum fram að birtingadegi þann 3. febrúar næstkomandi.
