Um helmingur Íslendinga hafa áhyggjur af heilbrigðisþjónustunni og spillingu í fjármálum og eða í stjórnmálum landsins að því er fram kemur í nýrri könnun MMR.
Í könnuninni gátu svarendur merkt við allt að þrjú atriði, en fæstir merktu við hryðjuverk eða, 1,7%, aðgengi að lánsfé, 2,2% og atvinnuleysi 2,4%.
Önnur málefni sem þátttakendur lýstu yfir áhyggjum af voru:
- Fátækt og/eða félagslegur ójöfnuður - 36,8%
- Viðhald velferðarkerfisins - 23,8%
- Loftslagsbreytingar - 16,8%
- Uppgangur öfgaskoðana - 14,4%
- Innflytjendamál - 14,2%
- Siðferðishnignun - 13,5%
- Menntun - 13,1%
- Verðbólga - 11,9%
- Glæpir og ofbeldi - 9,7%
- Ofþyngd barna - 9,5%
- Skattar - 9,3%
- Ógnir gegn umhverfinu - 8,1%
Í rannsókn sem Ipsos gerði í nóvember síðastliðnum í 25 löndum kom í ljós að heilt yfir hafði fólk í þessum löndum mestar áhyggjur af atvinnuleysi eða 38%.
Nánast jafnmargir höfðu áhyggjur af fátækt og eða félagslegum ójöfnuði og spillingu í fjármálum og eða stjórnmálum, eða 34 og 33 prósent.
Ungverjar, Pólverjar og Brasilíubúar með sömu áhyggjur
Íbúar í Ungverjalandi, Póllandi og Brasilíu höfðu líkt og Íslendingar mestar áhyggjur af heilbrigðisþjónustu í sínum löndum, eða 63%, 49% og 48% þeirra.
Nokkur munur reyndist á afstöðu milli lýðfræðilegra hópa Íslendinga, en konur höfðu meiri áhyggjur af heilbrigðisþjónustunni en karlar, eða 59% á móti 40%.
Landsbyggðarfólk meiri áhyggjur af fátækt
Færri konur höfðu þó áhyggjur af spillingu í fjármálum og eða stjórnmálum eða 45% þeirra á móti 53% karla. Jafnframt hafði yngra fólk minni áhyggjur af því, sem og af fátækt og eða félagslegum ójöfnuði, heldur en þeir sem eldri eru.
Fólk búsett á landsbyggðinni hafði þó meiri áhyggjur af hvoru tveggja, eða 55% af spillingu og 43% af fátækt meðan hlutföllin voru 45% og 33% meðal fólks á höfuðborgarsvæðinu.
Meðal námsmanna höfðu 60% þeirra áhyggjur af heilbrigðisþjónustu en einungis 32% þeirra sögðust hafa áhyggjur af spillingu.
Píratar áhyggjur af spillingu
Einnig reyndist munur eftir því hvaða stjórnmálaskoðanir menn hafa, en einungis 6% stuðningsmanna Framsóknar reyndust hafa áhyggjur af loftlagsmálum, samanborið við 25% stuðningsmanna Vinstri grænna. Höfðu stuðningsmenn Samfylkingar töluvert meiri áhyggjur af velferðarkerfinu en stuðningsmenn annarra flokka, eða 43% þeirra.
Stuðningsmenn Pírata höfðu töluverðar áhyggjur af spillingu eða 74% þeirra, meðan 26% stuðningsmanna Sjálfstæðisflokksins höfðu þær áhyggjur.
Jafnframt höfðu einungis 19% stuðningsmanna Sjálfstæðisflokksins áhyggjur af fátækt og eða félagslegum ójöfnuði, meðan 37% landsmanna í heild hafði þær áhyggjur.
Einnig höfðu 59% stuðningsmanna áhyggjur af heilbrigðisþjónustu í landinu samanborið við 33% stuðningsmanna Framsóknarflokksins.