Á fundi Kjördæmaráðs Sjálfstæðisflokksins í Suðurkjördæmi var ákveðið að gera breytingar á lista flokksins. Efstu þrjú sætin haldast þó óbreytt, en í fyrsta sæti situr Páll Magnússon sem fastast, Ásmundur Friðriksson heldur öðru sætinu og Vilhjálmur Árnason því þriðja. Þetta kemur fram á vef mbl.is.
Hins vegar þá færist alþingiskonan Unnur Brá Konráðsdóttir úr því fimmta og upp í fjórða sæti listans. Einnig er þeim Kristínu Traustadóttur og Hólmfríði Kjartansdóttur bætt við listann í fimmta og sjötta sæti.
Ragnheiður Elín Árnadóttir, iðnaðar- og viðskiptaráðherra, lenti í fjórða sæti prófkjörsins, en ákvað að yfirgefa vettvang stjórnmálanna vegna útkomu úrslitana. Mikil umræða spratt upp um kynjahlutföll listans og voru þessar breytingar gerðar í kjölfar þeirrar gagnrýni.
Hér má sjá efstu sex sæti listans:
- 1. sæti - Páll Magnússon, fjölmiðlamaður.
- 2. sæti - Ásmundur Friðriksson, alþingismaður.
- 3. sæti - Vilhjálmur Árnason, alþingismaður.
- 4. sæti - Unnur Brá Konráðsdóttir, alþingismaður.
- 5. sæti - Kristín Traustadóttir, endurskoðandi.
- 6. sæti - Hólmfríður Erna Kjartansdóttir, skrifstofustörf.