Árið er 2009 og hinn ástsæli forseti Brasilíu, Luiz Inacio Lula da Silva, segir stærsta olíufund Brasilíu „vegabréf Brasilíu til framtíðarinnar.“ Í kjölfarið halda Brasilíumenn bæði HM 2014 og Ólympíuleikana árið 2016 , allt virðist ganga eins og í sögu hjá þessu stærsta ríki Suður-Ameríku, eða hvað? Í áhugaverðri samantekt Bloomberg Quicktake á upprisi og falli Brasilíu á síðustu árum er farið í saumana á því hvernig svo mikil spilling getur grasserað innan pólitísku- & viðskiptaelítunnar í ríkinu og þau neikvæðu áhrif það getur haft. Nýjustu fregnir í Brasilíu eru þær að fyrrverandi forseti ríkisins, sem er best þekktur sem Lula, hafi verið dæmdur í nálega 10 ára fangelsi vegna spillingar . Í fyrra var Dilma Rousseff, fyrrverandi forseti ríkisins, ákærð fyrir embættisbrot og í kjölfarið tók varaforsetinn Michel Temer við af henni. Hann þarf nú að svara fyrir spillingaásakanir sjálfur.

Staðan

Gjaldmiðill Brasilíu, hlutabréf og skuldabréf hríðféllu í maí á þessu ári í kjölfar þess að fjölmiðillinn O Globo, birti fregnir af því að Michel Temer, forseti landsins, hafi tekið þátt í að þagga niður í vitni í spillingarskandal. Temer hefur neitað sök í málinu og mun ekki segja af sér. Í júní 2017 var hann sýknaður af ákæru um spillingu, þó í öðru máli en því sem var minnst á hér að ofan. Stóra verkefnið hjá forsetanum er að draga úr eyðslu í Brasilíu og koma ríkisfjármálunum á réttan kjöl, sem gæti reynst þrautinni þyngra.

Bakgrunnur

Brasilía hefur þurfta að glíma við uppgang og kreppur í bland við pólitískan óstöðugleika síðan landið öðlaðist sjálfstæði frá Portúgal árið 1822. Árið 2015 var helmingur útflutnings Brasilíu hrávörur. Því er ríkið mjög viðkvæmt fyrir breytilegu hrávöruverði. Staðan virðist góð í landinu á pappír: Brasilía er fimmta stærsta ríki heims þegar kemur að fólksfjölda og stærð. Brasilía á flenninóg af olíu, er ríkt af járni, og er annar stærsti framleiðandi af sojabaunum í heiminum. Í fyrra dróst hagkerfi ríkisins saman um 3,6% og þýðir það að hagkerfið er 8% minna en það var í desember 2014. Aftur á móti er mikil misskipting auðs í ríkinu. Þegar gekk vel í efnahagslífinu þá gat ríkið lagt traustar undirstöður af velferðarkerfi, en nú þegar kreppir að, fer velferðarkerfið fyrir bí. Helsta von Brasilíu er að auka fjárfestingu í landinu , en ekki hefur það gengið hingað til.

Getur Brasilía rétt úr kútnum?

Þá er það stóra spurningin sem Bloomberg veltir upp. Getur Temer, forseti Brasilíu, endurreist brasilískt efnahagslíf á nýjan leik? Fyrsta skrefið í áætlun Temer var að breyta stjórnarskránni til að draga úr eyðslu ríkisins , næstu tuttugu árin. Næst vill hann laga velferðarkerfið sem að hruni komið og ýta undir viðskiptavænna umhverfi í ríkinu með því að afregluvæða vinnumarkaðinn. Aftur á móti hafa nýjustu ásakanirnar á hendur forsetanum, sem minnst var á hér að ofan, gert það að verkum að hann á í sífelld erfiðara með að afgreiða kosningaloforð sín. Næstu forsetakosningar verða í Brasilíu á næsta ári. Einungis 10 prósent almennings styðja ríkisstjórn Termers og jafn margir styðja þingið. Staðan er í raun svo slæm að Lula, fyrrverandi forseti landsins og fyrrverandi formaður Verkamannaflokksins í Brasilíu, vill bjóða sig fram til forseta . Brasilíska þjóðin er klofin og byggist klofningurinn á því hvort að fólk styðji Lula, sem var dæmdur í 9 og hálfs árs fangelsi eða ekki.