*

laugardagur, 19. október 2019
Innlent 30. apríl 2019 11:29

Úrvalsvísitalan komin yfir 2000 stigin

Mikil hækkun Marel í morgun hefur ýtt vísitölunni upp í sögulegt hámark síðan hún var endurreist eftir hrun.

Ritstjórn
Árni Oddur Þórðarson forstjóri Marel tók við viðskiptaverðlaunum Viðskiptablaðsins og Frjálsrar verslunar um áramótin en síðan þá hefur gengi félagsins hjálpað til við að ýta Úrvalsvísitölunni í sögulegar hæðir.
Haraldur Guðjónsson

Frá því að Úrvalsvísitala kauphallar Nasdaq á Íslandi var endurreist eftir hrun hefur hún aldrei verið hærri en akkúrat nú, en eftir miklar hækkanir á Marel í morgun er hún komin yfir 2.000 stigin.

Eins og Viðskiptablaðið sagði frá í gærkvöldi var hagnaður Marel 14% hærri á fyrsta ársfjórðungi ársins en á sama tíma í fyrra. Hefur gengi bréfa félagsins hækkað um 4,44% það sem af er viðskiptum í morgun, en þau hafa numið 872 milljónum króna, og er það komið í 565,00 krónur þegar þetta er skrifað.

Kemur þessi hækkun til viðbótar við um fimmtungshækkun vísitölunnar frá áramótum sem Viðskiptablaðið sagði frá í síðustu viku. Vægi Marel er um helmingur af Úrvalsvísitölunni í dag, sem skýrir þessi miklu áhrif.

Um áramótin fékk Marel viðskiptaverðlaun Viðskiptablaðsins og Frjálsar verslunar og var Árni Oddur Þórðarson forstjóri fyrirtækisins í ítarlegu viðtali í Áramótatímaritinu að því tilefni.