Föst búseta í einstökum byggðarlögum á landsbyggðinni gæti veikst talsvert innan 20 ára. Um þetta er fjallað í Morgunblaðinu í dag.
Í viðtali blaðsins við Vífil Karlsson hagfræðing kemur fram að bæjarfélögin Akureyri, Ísafjörður, Stykkishólmur, Borgarnes, Drangsnes og Siglufjörður eru á meðal þeirra bæjarfélaga, þar sem hætt er við hækkandi húsnæðisverði
Segir Vífill vísbendingar vera um að utanbæjarfólk óski þess nú, í meira mæli en áður, að eignast frístundahús í þéttbýli á landsbyggðinni. Þetta hafi áhrif á húsnæðisverð í bæjarfélögunum sem leiði til þess að það hægist á endurnýjun íbúa á vinnumarkaði, þar sem víða fáist ekki góð lán til nýbygginga utan höfuðborgarsvæðisins.
Í viðtalinu tekur Vífill dæmi um Stykkishólm en Stykkishólmur er með einna hæst húsnæðisverð á landsbyggðinni og eiga ungar fjölskyldur því erfitt með að fóta sig á fasteignamarkaði þar vegna samkeppninnar. Eftirspurnin í Stykkishólmi endurspeglast í fjölda fasteigna sem ekki eru í eigu þeirra sem þar búa. þar eru um 70 eignir í eigu utanbæjarfólks, eða 25%.