Ásdís Kristjánsdóttir hagfræðingur og forstöðumaður efnahagssviðs Samtaka atvinnulífsins segir verðbólguhorfur eftir kosningar velta á því hve mikið verði úr kosningaloforðum flokkanna sem allir lofi auknum útgjöldum.
Einnig segir hún að það fari eftir því hvernig loforðin verði fjármögnuð sem liggi í flestum tilvikum ekki fyrir, enda misvel í lagt í loforðunum milli flokka að því er fram kemur í Morgunblaðinu.
„Við erum á hápunkti hagsveiflunnar og aukinn slaki við þær aðstæður eru ekki heppilegar,“ segir Ásdís um ríkisfjármálin og tekur þar með undir orð Ásgeirs Jónssonar dósents í hagfræði sem Viðskiptablaðið greindi frá í morgun.
„Það hefur verið rætt um að nýta tekjuafgang ríkissjóðs up á 44 milljarða króna í aukin útgjöld. [...]Hagsveifluleiðréttur tekjuafgangur ríkissjóðs á auðvitað að vera jákvæður, ekki síst á tímum mikillar þenslu, og þannig er spornað við sveiflum í hagkerfinu, fremur en að ýta undir þær.“
Segir Ásdís að hvort sem skattarnir verði lagðir beint á almenning eða á fyrirtækin dragi það úr ráðstöfunartekjum almennings enda séu stjórnvöld skuldbundin að uppfylla fjármálareglur um tekjuafgang og skuldir ríkisins.
„Ef útgjaldaaukningin yrði fjármögnuð með aukinni skattheimtu á fyrirtæki en ekki almenning, þá eykst kostnaður fyrirtækjanna sem því nemur sem getur farið út í verðlagið.“