Heildarútgjöld til rannsókna og þróunarstarfs á árinu 2018 voru 56,9 milljarðar króna en það jafngildir 2,02% af vergri landsframleiðslu. Árið 2017 voru útgjöldin 55,1 milljarður króna og jafngildir það 2,11% af vergri landsframleiðslu. Árið 2016 voru útgjöldin 53 milljarðar króna og jafngildir það 2,13% af vergri landsframleiðslu.
Þetta kemur fram í nýjum gögnum Hagstofu Íslands. Útgjöld vegna rannsókna og þróunar jukust hratt hérlendis á fáum árum. Árið 2013 voru þau 33,3 milljarðar króna og fer því nærri að þau hafi tvöfaldast árið 2018 í krónum talið. Hins vegar sýna gögnin að frá árinu 2016 hafa útgjöldin minnkað ár af ári, úr 2,13% niður í 2,02%.
„Gagnasöfnun Hagstofunnar nær yfir fyrirtæki, sjálfseignarstofnanir, háskólastofnanir og aðrar opinberar stofnanir. Skiptast heildarútgjöldin þannig að útgjöld fyrirtækja og sjálfseignarstofnana eru 36,6 milljarðar, útgjöld háskólastofnana 17,9 milljarðar og heildarútgjöld annarra opinberra stofnana 2,4 milljarðar.“
