Eftir miklar hækkanir eignaverðs víðsvegar um heim síðastliðin tvö ár, frá því að seðlabankar og ríkisstjórnir heimsins brugðust við efnahagsáhrifum heimsfaraldursins með fordæmalitlum örvunaraðgerðum, hafa markaðir verið á nokkuð stöðugri niðurleið það sem af er ári.

Bandaríska hlutabréfavísitalan S&P 500 hefur lækkað um rúm 13% það sem af er ári þrátt fyrir að eiga góða viku að baki, og á lágpunktinum í lok þarsíðustu viku nam árslækkunin hátt í 19%. Evrópska vísitalan STOXX Europe 600 var komin 15% niður á árinu fyrir nokkrum vikum en hefur einnig verið að rétta sig af síðustu daga og er nú aðeins 9,4% lægri en í ársbyrjun. Í Bretlandi er FTSE 250 vísitalan nú 15% lægri en um áramótin en hafði fallið um tæpan fimmtung fyrir nokkrum vikum.