Ríkisstjórnin fundar síðar í dag um nýjar tillögur Þórólfs Guðnasonar sóttvarnarlæknis í kjölfar fjölgunar kórónuveirusmita. Þá er blaðamannafundar að vænta í kjölfarið að því er fram kemur á mbl.is.
Upphaflega var boðað til upplýsingafundar Almannavarna vegna faraldursins klukkan 11 en svo hætt við fundinn skömmu síðar.
17 smit greindust innanlands í gær en þar af voru 3 utan sóttkvíar. Af þeim sem greindust voru 11 smit meðal barna í Laugarnesskóla.
Í samtali við RÚV segir Kári Stefánsson, forstjóri Íslenskrar erfðagreiningar, að stjórnvöld hljóti að skella í lás, strax í dag.
„Ef við gerum þetta myndarlega strax þá getum við komist fyrir þetta á skömmum tíma. Við höfum hreyft okkur aðeins of hægt og það hefði verið skynsamlegt að gera þetta strax á mánudag en stjórnvöld gera þetta vonandi í dag og þá eigum við smá séns,“ segir Kári við RÚV.
