*

þriðjudagur, 7. júlí 2020
Innlent 6. febrúar 2020 10:55

Vantar fólk í 1,1% starfa

Atvinnuleysi jókst um 0,9 prósentur, í 3,3% á fjórða ársfjórðungi, eða um 6.800 manns, á sama tíma og 2.500 störf eru laus.

Ritstjórn
Haraldur Guðjónsson

Atvinnuþátttakan mældist 79,6% hjá fólki á aldrinum 16 til 74 ára, á fjórða ársfjórðungi ársins 2019, eða að jafnaði um 206.400 manns að því er Hagstofa Íslands greinir frá. Þar af töldust 6.800 manns atvinnulausir, eða um 3.3%, en á sama tíma voru um 2.500 laus störf á íslenskum vinnumarkaði, eða 1,1% allra starfa samkvæmt starfaskráningu Hagstofunnar.

Til samanburðar voru um 4.900 manns atvinnulausir á fjórða ársfjórðungi 2018 og jókst atvinnuleysi um 0,9 prósentustig á tímabilinu. Fjöldi starfandi fólks var um 199.700 á fjórða ársfjórðungi 2019 var, eða 77,0% af mannfjölda, sem er aukning um 800 manns frá fjórða ársfjórðungi árið á undan. Hlutfall starfandi lækkaði þó um 1,6 prósentustig fyrir sama tímabil.

Fjölgun utan vinnumarkaðar, í 53 þúsund manns

Fjöldi starfandi í fullu starfi jókst um 5.400 manns frá fyrra ári, en af starfandi fólki voru 77,2% í fullu starfi, sem er aukning um 2,4 prósentustig frá fjórða ársfjórðungi 2018.

Um 53.000 manns töldust utan vinnumarkaðar á fjórða ársfjórðungi 2019, sem er fjölgun um 3.600 manns. Áætlaður mannfjöldi á aldrinum, 16 til 74 ára, jókst á sama tíma um 2,5%, úr um 253.100 í 259.400 manns.

Yfir 10% atvinnulausir lengur en í ár

Af þeim sem voru atvinnulausir á fjórða ársfjórðungi 2019 höfðu að jafnaði um 3.600 manns verið atvinnulausir í 2 mánuði eða skemur eða 52,7% atvinnulausra. Til samanburðar höfðu um 3.500 verið atvinnulausir í tvo mánuði eða skemur á sama tíma 2018, eða 48,3%.

Um 700 manns höfðu verið langtímaatvinnulausir á fjórða ársfjórðungi 2019 eða 10,5% atvinnulausra, en langtímaatvinnulausir teljast þeir sem hafa verið atvinnulausir í 12 mánuði eða lengur. Til samanburðar voru um 500 manns langtímaatvinnulausir á fjórða ársfjórðungi 2018 eða 7,5% atvinnulausra.