„Eins og heimildarmaður þáttarins hefur lýst að þá fyrir rúmum fimm árum rek ég þarna inn nefið og heilsa þessum mönnum og á við þá spjall um daginn og veginn en grundvallaratriði í þessum málum fyrir mig er að ég hef engin afskipti af þessu eða upplýsingar um viðskipti eða neitt því um líkt og þar af leiðandi hef ég ekkert að fela í þessum efnum.“
Þetta segir Kristján Þór Júlíusson sjávarútvegsráðherra í viðtali á RÚV í dag, en hann segir jafnframt það algjöra tilviljun að hann hafi verið staddur á skrifstofu Samherja á sama tíma og viðskiptafélagar Samherja frá Namibíu voru þar á fundi.
Helsti heimildarmaður í fréttaskýringaþættinum Kveik í gærkvöld, Jóhannes Stefánsson, fyrrum starfsmaður Samherja, greindi frá því að Kristján Þór hafi hitt svokallaða hákarla frá Namibíu, þremenningana Tamson, James og Sacky, á fundi í höfuðstöðvum Samherja í Borgartúni árið 2014. Á fundinum er forstjóri Samherja Þorsteinn Már Baldvinsson sagður hafa kynnt Kristján sem "sinn mann" í ríkisstjórninni.
Kristján Þór var formaður stjórnar Samherja á árinu 1996-98.
„Ég hef ekki haft afskipti af þessu fyrirtæki, rekstri eða öðru, frá því að ég hætti í stjórn fyrir tæpum tveimur áratugum; nítján árum. En auðvitað hefur maður taugar til fyrirtækisins og starfseminnar fyrir norðan. Eðlilega, þetta er stór partur af norðlensku samfélagi,“ segir Kristján og bætir við síðar í viðtalinu.
„Þannig hittist bara á í þessu tilfelli að ég á persónulegan fund með einstaklingi sem ég hef þekkt í langan tíma um allt önnur mál að þá rekst ég á þessa einstaklinga,“ sagði Kristján og bætti því við að Samherjamenn verði að svara því sjálfir hvað átt var við þegar hann var sagður vera þeirra maður.
