*

fimmtudagur, 29. júlí 2021
Innlent 4. febrúar 2021 14:34

Vaxandi trú ferðaheildsala á Íslandi

Meðmælatryggð áfangastaðarins Íslands hefur ekki mælst hærri en nú samkvæmt könnun Íslandsstofu.

Ritstjórn
Haraldur Guðjónsson

Erlendir ferðaheildsalar hafa vaxandi trú á Íslandi og íslenskri ferðaþjónustu samkvæmt nýrri könnun Íslandsstofu. Í henni er mæld svokölluð meðmælatryggð en hugtakið metur samspil þeirra sem mæla með ferðalögum til Íslands og þeirra sem gera það ekki. Meðmælatryggð áfangastaðarins mældist 65 stig og hefur aldrei mælst hærri en nú. Könnunin er gerð tvisvar á ári.

Þættir eins og öryggi, viðbrögð stjórnvalda við Covid-19 heimsfaraldrinum, lág tíðni smita og sjálfbærni hafa áhrif.

„Niðurstöður könnunarinnar gefa góð fyrirheit um enduruppbyggingu greinarinnar þegar faraldrinum lýkur. Við verðum þó að vera raunsæ og væntingar um bókanir í upphafi árs eru töluvert neikvæðari en við höfum séð í fyrri könnunum" segir Sigríður Dögg Guðmundsdóttir, fagstjóri ferðaþjónustu hjá Íslandsstofu, í fréttatilkynningu þar sem greint er frá niðurstöðum könnunarinnar..

„Það er ljóst að við þurfum að sýna þolinmæði. Það er þó áhugavert að sjá að meirihluti þátttakenda í könnuninni telja að bókanir á ferðum til Íslands taki við sér strax á fyrri hluta ársins og verði orðnar álíka margar á næsta ári og þær voru áður en landamærin lokuðust.“

Könnunin bendir til þess að nærmarkaðir, Norðurlönd, Mið- og Suður-Evrópa og Bretland verði fyrstir til að taka við sér sem er í samræmi við áætlanir Íslandsstofu. „Þessar niðurstöður eru í takt við áherslur í markaðsverkefninu Saman í sókn. Við fylgjumst að sjálfsögðu vel með þróuninni á okkar helstu markaðssvæðum og lögum aðgerðir að breytingum sem kunna að verða," er haft eftir Sigríði Dögg.