Almennir fjárfestar í Bandaríkjunum hafa á undanförnum dögum verið að kaupa hlutabréf í fyrirtækjum sem nýverið hafa sótt um greiðslustöðvun.
Við lokun markaða í gær hafði gengi hlutabréfa bílaleigufyrirtækisins Hertz meira en fjórfaldast og bréf smásalans JC Penny nær tvöfaldast það sem af er júnímánuði þrátt fyrir að bæði félög hafi sótt um greiðslustöðvun í síðasta mánuði.
Sjá einnig: Hertz sækir um greiðslustöðvun
Hækkanir félaganna hafa komið ýmsum sjóðsstjórum og greiningaraðilum á óvart. Það virðist vera að stór hópur almennra fjárfesta séu tilbúnir að veðja á endurkomu félaganna, en þetta kemur fram í grein Financial Times .
Notendur Robinhood, smáforrit fyrir viðskipti hlutabréfa, hafa keypt fleiri hlutabréfí Hertz á undanförnum þremur dögum heldur en í nokkru öðru skráðu félagi í Bandaríkjunum.
Sömu sögu er að segja um fyrirtæki í orkugeiranum. Hlutabréf Whiting Petroleum hækkuðu um 150% á mánudaginn en fyrirtækið sótti um greiðslustöðvun í apríl. Hlutabréf fyrirtækisins Chesapeake Energy, sem er á barmi gjaldþrots, hækkaði um 180% á mánudaginn.
Sjá einnig: Bónusar rétt fyrir greiðslustöðvun
Paul Markham, sjóðsstjóri Newton Investment Management, segir að fjárfestar gætu verið að vonast eftir björgunarpökkum frá bandaríska ríkinu líkt og bandaríski bílamarkaðurinn fékk í fjármálakrísunni 2008-09.
Skráðu félögin sem um ræðir í fréttinni hafa öll fallið hressilega aftur á síðustu tveimur dögum. Peter Boockvar, forstjóri ráðgjafafyrirtækisins Bleakley Advisory Group, sagði að hinar miklu hækkanir á undanförnum dögum báru merki um „froðu“ í ákveðnum hluta markaðarins.
