Valur Þráinsson heillaðist af samkeppnismálum þegar hann stundaði hagfræðinám í Amsterdam. Honum þótti vanta yfirsýn yfir samkeppnisstöðu á mörkuðum, og því fór hann að velta því fyrir sér hvernig hægt væri að leysa vandamálið með hjálp tækninnar. Eftir ýmsar athuganir datt honum í hug að setja upp vefsíðu, sem myndi taka saman allar mikilvægustu fréttir og upplýsingar um samkeppnismál. Vefsíðan hefur nú verið í prufukeyrslu í nokkrar vikur, en hún hefur fengið nafnið Competitionfeed.com.
Valur hefur starfað fyrir Sam keppniseftirlitið í fjögur ár, en hefur verið að sinna CompetitionFeed á hliðarlínunni seinustu tvö ár. Að hans sögn er það gríðarlega mikilvægt fyrir samkeppnisaðila að vera með puttann á púlsinum. Í gegnum tíðina hefur það hins vegar reynst erfitt að halda yfir sýninni. Félögum hefur fjölgað, starfssviðin eru fleiri og fyrirtæki starfa á ýmsum nýjum og alþjóðlegum mörkuðum.
Valur segir CompetitionFeed leysa þennan hausverk með afskaplega auðveldum hætti. „Vefsíðan safnar saman fréttum, bloggfærslum og tilkynningum af rúmlega 300 vefsíðum, með því að hlusta á svokallaða RSS strauma. Upplýsingarnar birtast svo allar í einfaldri röð á vegg Competitionfeed.com. Þar geta eftirlitsaðilar, ráðgjafar og stjórnendur fylgst með upplýsingum um samkeppnismál, eða séð hvernig fjallað er um þeirra rekstur.“ CompetitionFeed á þó einnig að nýtast nemum og fræðimönnum, og því birtir síðan einnig fræðirit um samkeppnismál.
Fullkláruð útgáfa á markað í ágúst
Félagi Vals, Þórður Hermannsson, hefur sinnt forrituninni, en sú vinna hefur staðið yfir í rúmt ár. Valur hefur fjármagnað fram leiðsluna sjálfur, en gert er ráð fyrir því að síðan fari að skila tekjum í náinni framtíð. Nemendur munu geta nýtt sér þjónustuna frítt, en grunnáskrift mun kosta tæpar 7 evrur. Fyrirtækjum og stofnunum mun þá einnig standa til boða að fá sérsniðnar vörur fyrir sinn rekstur. Sérsniðin vara mun þó kosta að lágmarki 85 evrur.
Nú þegar eru nokkur íslensk fyrirtæki að nota prufuútgáfu CompetitionFeed. Síðan á í raun að geta komið öllum stofnunum og fyrirtækjum til góðs. Sérstök sóknarfæri eru í sérsniðnu útgáfusíðunnar, enda býður hún upp á mikinn sveigjanleika. Viðskiptavinur gæti til að mynda verið ráðgjafafyrirtæki sem hefði einungis áhuga á að fylgjast með viðskiptavinum sínum og vörumerkjum þeirra. Sérsniðin síða getur þá verið verulega nytsamleg.
Í ágúst á fullkláruð útgáfa af síðunni að fara á markað. Valur segir það þó mikilvægt að hætta ekki þróun. „Við höfum nú þegar byrjað að fikta við einhverskonar gervigreind, sem á að læra á áhugasvið notendanna.“ Forritið á þá að sía út þær tilkynningar og fréttir sem notandinn hefur mestan áhuga á. Ef notandinn virðist einungis vera að skoða fréttir um greiðslumiðlun, þá koma frekar upplýsingar á vegginn um greiðslumiðlun. Ef notandinn er einungis að skoða fréttir tengdar sjávarútvegi, þá koma aðallega upplýsingar um sjávarútveginn.