„Nú er unnið að því hörðum höndum að setja upp miðasölu og vefsíðu Wow og stefnt er að því að hvor tveggja fari í loftið á allra næstu dögum,“ segir Páll Ágúst Ólafsson, lögmaður athafnarkonunnar Michelle Ballarin, aðaleiganda og stjórnarformanns Wow.
Michelle Ballarin tilkynnti á blaðamannafundi að Wow air muni fljúga að nýju í október. Fyrsta flugið er áætlað milli Dulles flugvallar í Washington og Keflavíkur, en höfuðstöðvar félagsins verða í framtíðinni í Washington borg í Bandaríkjunum.
