Heildarafli í febrúar 2021 var rúmlega 76 þúsund tonn sem er 48% meiri afli en í sama mánuði árið 2020. Uppsjávarafli var 28 þúsund tonn en var 6.600 tonn í febrúar árið á undan. Þar af var rúmum 26 þúsund tonnum af loðnu landað en engin loðna veiddist allt árið í fyrra. Botnfiskafli var tæp 46 þúsun tonn. Hagstofan greinir frá þessu.
Í frétt Hagstofunnar segir að á 12 mánaða tímabili, frá mars 2020 til febrúar 2021, hafi heildaraflinn verið rúmlega ein milljón tonn sem sé álíka magn og hafi verið landað á sama 12 mánaða tímabili ári áður. Uppsjávarafli hafi verið 564 þúsund tonn, botnfiskafli 474 þúsund tonn og flatfiskafli tæp 25 þúsund tonn.
Þá sýni afli í febrúar, metinn á föstu verðlagi, 9,5% meiri aukningu í verðmætum en í febrúar 2020.
